आद्यशक्ति भगवानशिवकी अर्धाङ्गीनी हिमालय पुत्री पार्वतीले भगवान शिवको स्वास्थ्य तथा शरीरमा कुनै वाधा उत्पन्न नहोस् भनेर पहिलो वत्र राखेकि थिईन् त्यो दिन हरितालिका तिजको दिन थियो । त्यसै दिन देखी आज सम्महिन्दु नारीहरूले यो पर्व मनाउदै आएका छन् ।
तीज हिन्दू नारीहरूले मनाउने एउटा महत्वपूर्ण चाडको रुपमा हरितालीका तीजलाई लिईन्छ ।
भाद्र शुक्ल द्वीतिया देखि पञ्चमी सम्म ४ दिन मनाईने यो चाडमा भगवान शिवको आराधना गरिनुका साथ–साथै नाचगान मनोरञ्जन समेत गर्ने गरेको पाइन्छ ।
नेपाली हिन्दू महिलाहरूद्वारा स्वतन्त्र र आनन्दमय रूपमा मनाइने तीज अन्य धर्म र जातजातिका नेपाली महिलाहरूले पनि हर्षोल्लासका साथ मनाउन थालेका छन् ।
यो चाडमा माइतीबाबु आमा, दाजुभाइले छोरी चेली लाई घरमा बोलाएर मीठा मीठा परिकार ख्वाउँने तथा मनका भावना एवं सुख दुःख साटासाट गरी एउटै ठाउँमा खाने बस्ने चलन रहि आएको छ । यहि दर खाने दिन बाट नै तिज पर्वको आरम्भ भएको मानिन्छ ।
दरमा खीर, सेलरोटी, केरा आदि अथवा ठाँउ अनुसार विभिन्न मिठा मिठा परिकार खाने गरिन्छ ।
सामान्यतया दर मध्यरात १२ बजेअघि खाने चलन छ । भोलिपल्ट दिनभर पानी सम्म पनि नखाई निराहार व्रत बस्नुपर्ने भएकोले दर खाने चलन चल्दै आएको मानिन्छ ।
तीजको दिनका अतिरिक्त गणेश चतुर्थी र ऋषिपञ्चमी लाई पनि तीज पर्वकै रूपमा मनाइन्छ । खास गरी यसमा स्त्रीहरूले पतिको निमित्त निराहार रहेर भगवान शिव तथा आद्यशक्ति पार्वती सँग प्रार्थना गर्दछन् । यो दिन महिलाहरु विहान चाँडै उठी नुहाई धुवाई गरेर दिनभरी जल अन्न ग्रहण नगरी ब्रत बस्ने गर्दछन ।
बेलुकी पख घर टोल र छिमेकका महिलाहरु भेला भई पूजाका सामान तथा मण्डप तयार गरी भगवान शिवको आराधना गर्ने प्रचलन रहेको छ । कतिपय महिलाहरु नजीक रहेको शिव मन्दिरमा गई शिव आराधनाका साथै नाचगान तथा रमाईलो गर्ने गर्दछन् ।
धार्मिक महत्व
हिन्दू धार्मिक ग्रन्थ अनुसार राजा हिमालयले आफ्नी छोरी पार्वतीको कन्यादान भगवान विष्णुसँग गरिदिने वचन पार्वतीलाई मन नपरे पछि आफूले मन पराएको वर पाउन जङ्गल गएर शिवजीको तपस्या गर्न थालिन् । पार्वतीले तपस्या गरेको एक सय वर्ष पूरा भइ सक्दा पनि आफूले गरेको तपस्याको फल नपाउँदा एक दिन उनले शिव लिङ्गको स्थापना गरी पानी पनि नपिईकन निराहार व्रत बसिन्।
यसरी पार्वतीको कठोर व्रतको कारण शिवजी प्रकट भई चिताएको कुरा पुगोस् भनी आशिर्वाद दिए पछि शिव पार्वतीको विवाह हुन पुग्यो । त्यो दिन भाद्र शुक्ल तृतीयाको दिन थियो । सोही तिथीदेखि हिन्दू नारीहरूले यस दिनलाई उत्सवका रूपमा मनाउन थालेको र यो तीजको रूपमा मनाउने चलन पौराणिक कालदेखि चल्दै आएको मानिन्छ ।
